މި އަހަރުގެ ތިންވަނަ ކުއާޓާގައި ދިވެހިރާއްޖޭގެ ޤައުމީ އުފެއްދުންތެރިކަން (ޖީޑީޕީ) ގެ ނިސްބަތް 6.5 އިންސައްތައިން އިތުރުވެފައިވާ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފިއެވެ.
އެގޮތުން، އެމްއެމްއޭ އިން ރިޕޯޓްކޮށްފައިވަނީ، މި އަހަރުގެ ފުރަތަމަ ކުއާޓާގައި 7.7 އިންސައްތަ އިން ޖީޑީޕީ އިތުރުވިއިރު، ދެވަނަ ކުއާޓާގައި ޖީޑީޕީ އިތުރުވުން 4.5 އިންސައްތައިގެ ހިފެހެއްޓިފައިވާ ކަމަށެވެ. އަދި، އެއަށްފަހު ތިންވަނަ ކުއާޓާގައި ޤައުމީ އުފެއްދުންތެރިކަން އަލުން އިތުރުވާން ފަށާފައިވާ ކަމަށް ވެސް އެމްއެމްއޭގެ ރިޕޯޓްތައް ދައްކައެވެ.
އެމްއެމްއޭ އިން ފާހަގަކުރި ގޮތުގައި، ތިންވަނަ ކުއާޓާގައި ޤައުމީ އުފެއްދުންތެރިކަމަށް އެންމެ ބޮޑު ހިއްސާއެއް ކުރީ ސަރުކާރުގެ ހިންގުމުގެ ދާއިރާ އިންނެވެ. ހިންގުމުގެ ދާއިރާ ފުޅާވުމުގެ ސަބަބުން ޤައުމީ އުފެއްދުންތެރިކަން އިތުރަށް ފުޅާވެގެންދިޔައިރު، މުވާސަލާތީގޮތުންނާއި ދަތުރުފަތުރާއި، ފަތުރުވެރިކަމުގެ އިތުރުން އިމާރާތްކުރުމާއި ރިއަލް އެސްޓޭޓް ދާއިރާ ވެސް އިހުނަށްވުރެ ބޮޑަށް ކުރިއެރުންތައް ހޯދާފައިވާ ކަމަށް އަންދާޒާ ކުރެވެއެވެ.
މި އަހަރުގެ ތިންވަނަ ކުއާޓާގައި ފަތުރުވެރިކަމުގެ ރޮނގުން މާލީގޮތުން ހޯދާފައިވާ ކުރިއެރުންތަކުގެ ތެރޭގައި، 2023 ވަނަ އަހަރުގެ ތިންވަނަ ކުއާޓާއާ އަޅާބަލާއިރު މިއަހަރުގެ ތިންވަނަ ކުއާޓާގެ ނިޔަލަށް އައި ފަތުރުވެރިންގެ އަދަދު ވަނީ 10 އިންސައްތަ އިތުރުވެފައެވެ. އަދި، ނިމުނު އަހަރުގެ މި މުއްދަތާ އަޅާބަލާއިރު ރިސޯޓްތަކުގެ ބެޑްނައިޓްސް ވެސް އިތުރުވެފައިވާ ކަމަށް އެމްއެމްއޭ އިން ފާހަގަކުރެއެވެ.
ީމީގެއިތުރުން، ރާއްޖޭގެ އިޤުތިޞާދުގެ އެންމެ މުހިއްމު އެއް ދާއިރާ ކަމަށްވާ، މަސްވެރިކަމުގެ ސިނާޢަތަށް ހީނަރުކަން އައިސްފައިވާކަން ވެސް އެމްއެމްއޭގެ ރިޕޯޓްތަކުން ދައްކައެވެ. އެގޮތުން، މިއަހަރުގެ ތިންވަނަ ކުއާޓާގައި މަސްވެރިކަން 44.9 އިންސައްތަ ދަށަށް ދިޔައިރު، އެ ސިނާޢަތުގެ ޖުމްލަ އުފެއްދުންތައް ވެސް ވަނީ 50 އިންސައްތަ ދަށަށް ގޮސްފައެވެ.
