ނައިންޓީ ޕްލަސް ގޯލްޑް ކަޕްގައި ރޭ ކުޅުނު މެޗުގައި ރ. އަލިފުށި 2-0 އިން ބަލިކޮށް، އައްޑޫ ސިޓީން ފައިނަލަށް ދަތުރުކޮށްފިއެވެ.
ގަލޮޅު ރަސްމީ ދަނޑުގައި ރޭ ކުޅުނު މި މެޗުގައި އައްޑޫން ޖެހި ހުރިހާ ގޯލެއްވެސް ކާމިޔާބުކުރީ ފަހު ހާފުގައެވެ.
އައްޑޫގެ ފުރަތަމަ ލަނޑުޖަހައިދިނީ ގައުމީ ޓީމުގެ ކުރީގެ މިޑްފީލްޑަރު، ޝަމްވީލް ގާސިމް (ބޮންޑާ) އެވެ. ބޮންޑާ މި ލަނޑުޖެހީ އެ ޓީމުގެ އިސްމާއިލް އީސާ ނަގައިދިން ކޯނަރަކުން ލިބުނު ބޯޅައެއް ބޮލުން ގޯލްގެތެރެއަށް ފޮނުވާލައިގެންނެވެ.
އެ ޓީމުގެ ދެވަނަ ލަނޑު ޖަހައިދިނީ އިބްރާހިމް މަހުދީ ހުސައިން (ފޭދޫ އިއްބެ) އެވެ. މިއީ ބޮންޑާ ފޮނުވާލި ބޯޅައެއްގެ ރީބައުންސްގައި ފޭދޫ އިއްބެ ކާމިޔާބުކުރި ގޯލެކެވެ.
މި މުބާރާތުގެ ފައިނަލްގައި އައްޑޫ ނުކުންނާނީ ބ. އޭދަފުއްޓާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ އަންނަ އަންގާރަ ދުވަހުގެ ރޭ ނުވައެއް ޖަހާއިރު އެވެ.
