ކުރިއަށް އޮތް ތަނުގައި ދުންފަތުގެ އިސްތިޢުމާލުނުކުރެވޭ އާއްމު ތަންތަން އިތުރުވާނެ ކަމަށް ހެލްތު މިނިސްޓްރީ ބުނެފިއެވެ.
ހެލްތު މިނިސްޓްރީގެ ޑެޕިއުޓީ މިނިސްޓަރ، އަލްއުސްތާޛު އިސްމާއިލް ޒާހިރު މިހެން ވިދާޅުވި، އެ މިނިސްޓްރީ އާއި ޓީވީ މޯލްޑިވްސް ގުޅިގެން ގެނެސްދޭ “ދަފަރާ” ޕެނަލް ޑިސްކަޝަންގައި ވާހަކަފުޅު ދައްކަވަމުންނެވެ.
ދުންފަތުގެ ދުމުން މުޖުތަމަޢު ރައްކާތެރިކުރުމަށް އެކުލަވާލާ ޤަވާއިދުގެ ޑްރާފްޓް މިހާރު ނިމިފައިވާ ކަމަށް ވެސް ޑެޕިއުޓީ މިނިސްޓަރ ޒާހިރު ވަނީ ވިދާޅުވެފައެވެ.
އެ ޤަވާާޢިދު ގެޒެޓް ކުރުމުން ދުންފަތުގެ އިސްތިއުމާލުކުރެވޭނެ ތަންތަނާއި ނުކުރެވޭނެ ތަންތަނަށް ބޮޑެތި ބަދަލުތަކެއް އަންނާނެއެވެ. އެގޮތުން މިހާރު ދުންފަތުގެ އިސްތިޢުމާލު ނުކުރެވޭނެ ކަމަށް ކަނޑައަޅާފައިވާ ތަންތަން އިތުރު ވެގެންދާނެއެވެ. ހަމަ މިއާއި އެކު ދުންފަތުގެ އިސްތިޢުމާލު ކުރެވޭނެ ތަންތަންވެސް ކަނޑައެޅިގެންދާނެއެވެ.
ޒާހިރު އިތުރަށް ވިދާޅުވީ، ގަވާޢިދު އާއްމުކުރާ ހިސާބުން ޤާނޫނު ތަންފީޒުކުރާ އިދާރާތަަކަށް ވެސް، މި ޤާނޫނު ތަންފީޒުކުރުމަށް ކުރަންޖެހޭ ކަންކަން ފަސޭހަ ވެގެންދާނެކަމަށެވެ.
ދުންފަތް ކޮންޓްރޯލް ކުރުމަށް ޤާނޫނަށް ގެނެވުނު އިސްލާހާގުޅިގެން އަތޮޅުތަކުގައި އާންމުން ހޭލެންތެރިކުރުމަށް، ކައުންސިލްތަކާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީ، އަދި ޖަމްޢިއްޔާތަކާ ގުޅިގެން މިނިސްޓްރީން ދަނީ މަސައްކަތްކުރަމުނެވެ.
އަދި ސަރުކާރުގެ މުޢައްސަސާތަކުގެ ކަމާގުޅޭ ފަރާތްތައް އަހުލުވެރިކުރުމާއި އެފަރާތްތަކާ ގުޅިގެން މަސައްކަތްތަކެއް ކުރެވެމުންދާކަމަށް ވެސް ރޭގެ ޕެނަލް ޑިސްކަޝަންގައި ޑެޕިއުޓީ މިނިސްޓަރ ޒާހިރު ވަނީ ވިދާޅުވެފައެވެ.
ދަފަރާ” ޕެނަލް ޑިސްކަޝަންގައި، މިނިސްޓްރީ އޮފް ހެލްތު ގެ އިތުރުން، މޯލްޑިވްސް ޕޮލިސް ސާރވިސް، އަދި މޯލްޑިވްސް ކަސްޓަމްސް ސަރވިސް ގެ ފަރާތުންވެސް ވަނީ ބައިވެރިވެފައެވެ.
