ސީރިއާގެ ރައީސް ބައްޝާރުލް އަސަދާއި އޭނާގެ އާއިލާ އަށް ރަޝިއާ އިން ހިމާޔަތް ދީފި އެވެ.

ސީރިއާގެ ސަރުކާރާއި ދެކޮޅަށް މަސައްކަތް ކުރާ ހަނގުރާމަވެރި ޖަމާއަތްތަކުން އެގައުމުގެ ވެރިރަށް، ދިމިޝްގު ހިފުމާއެކު އަސަދު ވަނީ ގައުމު ދޫކޮށް

ފިއްލަވާފަ އެވެ.

ރަޝިއާގެ ސަރުކާރުގެ އޮފިޝަލަކާއި ހަވާލާދީ އެގައުމުގެ މީޑިއާތަކުން ރިޕޯޓުކޮށްފައިވާ ގޮތުގައި އަސަދާއި އޭނާގެ އާއިލާ މިވަގުތު ތިބީ ރަޝިއާގެ ވެރިރަށް މޮސްކޯގަ އެވެ. އަސަދާއި އޭނާގެ އާއިލާ އަށް ހިމާޔަތް ދީފައިވަނީ އިންސާނީ އެހީތެރިކަން ފޯރުކޮށްދިނުމުގެ ގޮތުން ކަމަށް ބުނެފައިވެ އެވެ.

ރަޝިއާ އަކީ ސީރިއާގެ 13 އަހަރުވީ ދާހިލީ ހަނގުރާމައިގައި އަސަދަށް ވަރަށް ބޮޑަށް އެހީތެރިކަން ފޯރުކޮށްދިން ގައުމެކެވެ. އަސަދު ވަނީ ސީރިއާގެ ވެރިކަމުގައި 24 އަހަރު ހޭދަކޮށްފަ އެވެ.

ސީރިއާގެ އިދިކޮޅު ލީޑަރު ހާދީ އަލް ބަހްރާ އަލް-އަރަބިޔާ އަށް ވިދާޅުވީ އަސަދުގެ ވެރިކަން ވެއްޓުމަކީ އަނދިރިކަމުގެ ތެރެއިން އަލިކަމުގެ ތެރެއަށް ސީރިއާ ރުޖޫއަވުން ކަމަށެވެ.

“އެ ކަޅު ސޮފްހާ މާޒީވެގެން ދިޔައީ. މިއީ ސީރިއާގެ ރައްޔިތުންނަށް ލިބުނު ނަސްރެއް.” އޭނަ ވިދާޅުވި އެވެ.

ދެހާސް އެގާރައިގެ ފަހުން ސީރިއާ އޮތީ ދާހީލީ ހަނގުރާމައެއްގެ ތެރޭގަ އެވެ. މީގެ ސަބަބުން ގައުމު ވަރަށް ބޮޑަށް ވީރާނެ، ސުންނާފަތިވެ، ރައްޔިތުން ތިބީ އިންސާނީ ބޮޑު ކާރިސާއެއްގެ ތެރޭގަ އެވެ.

ސީރިއާ އަކީ މެދުއިރުމަތީގެ ގައުމުތަކުގެ ތެރެއިން ހާލަތު އެންމެ ގޯސް އެއް ގައުމެވެ.