ރާއްޖެ އެތެރެ ކުރަން އުޅުނު މިލިއަނެއްހައި ރުފިޔާގެ މަސްތުވާތަކެތި މޯލްޑިވްސް ކަސްޓަމްސް ސާވިސް އިން އަތުލައިގަނެފި އެވެ.
ކަސްޓަމްސް އިން މީޑިޔާތަކަށް ފޮނުވި މެސެޖްގައި ބުނީ ކޫރިއާ މެދުވެރިކޮށް ރާއްޖެއަށް އެތެރެ ކުރަން އުޅުނު 395 ގުރާމްގެ މަސްތުވާތަކެތި ކަސްޓަމްސްއިން އަތުލައި ގަނެފައިވާކަމަށެވެ.
މި ތަކެތި އަތުލައިގަނެފައި ވަނީ ކޫރިއާ މެދުވެރިކޮށް ރާއްޖެއަށް ގެނެސްފައިވާ ޕެކޭޖެއް ބަލައި ފާސްކުރުމުގެ ތެރޭގައި ޝައްކު ކުރެވޭ ޒާތުގެ ބާވަތެއް ހުރުމުން އިތުރަށް ބަލާ ފާސްކުރުމުގެ ތެރޭގައި ކަމަށް ކަސްޓަމްސް އިން ބުނެފައިވެއެވެ.
ކޫރިއާ މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލައި ފާސްކުރިއިރު އެ ޕެކޭޖުގެ ތެރެއިން މަސްތުވާތަކެތިކަމަށް ޝައްކު ކުރެވޭ ތަކެތި ތަހުލީލު ކުރިކަމަށް ވެސް ކަސްޓަމްސް އިން ބުނެފައިވެއެވެ. އަދި އެތަކެތި ތަހުލީލު ކުރިއިރު މަސްތުވާތަކެތީގެ ބާވަތެއް ކަމަށްވާ ކޮކެއިން އަށް ޕޮޒިޓިވް ވެފައިވާކަމަށް ކަސްޓަމްސް އިން ބުންޏެވެ.
ކަސްޓަމްސް އިން އިތުރަށް ބުނީ މި ތަކެތީގެ މަގުމަތީ އަގަކީ 987،500 ( ނުވަ ލައްކަ އަށްޑިހަ ހަތްހާސް ފަސް ސަތޭކަ) ދިވެހި ރުފިޔާކަމަށް ލަފާކުރެވޭކަމަށެވެ. މި މައްސަލަ އިތުރަށް ތަހުގީގުކުރުމަށް މައްސަލައިގައި އަތުލެވުނު މަސްތުވާތަކެއްޗާއި، މި ކަމުގައި ޝާމިލުވާ ދިވެހި ފިިރިހެނަކު މިހާރު ފުލުހުންނާ ހަވާލުކޮށްފައިވާކަމަށް ވެސް ކަސްޓަމްސް އިން ބުނެފައިވެއެވެ.
