ޞިއްޙީ ޙާލުކޮޅު ހުރިގޮތުން ޑޮކްޓަރ ޢާއިޝަތު ރަމީލާ، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމުން މިއަދު އިސްތިޢުފާދެއްވާފައިވާތީ، މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރ ހިންގެވުން ވަގުތީގޮތުން މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް، ޑޮކްޓަރ މަރްޔަމް މާރިޔާ އާއި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޙަވާލުކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުން މިރޭ ވިދާޅުވީ މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމަށް ބޭފުޅަކު ޢައްޔަނުކުރެވެންދެން އެމިނިސްޓްރީ ހިންގެވުން މިނިސްޓަރ ޑރ.މާރިޔާ އާއި ހަވާލު ކުރައްވާފައިވާ ކަމަށެވެ.
މިނިސްޓަރ ރަމީލާ މިއަދު ވަޒީރުކަމުން އިސްތިއުފާ ދެއްވީ ސިއްހީހާލުކޮޅު ހުރިގޮތުންނެވެ. މިނިސްޓަރ ރަމީލާ ކެންސަރުގެ އާލާސްކަންފުޅަކަށް ފަރުވާ ހޯއްދަވަމުން ގެންދަވާތާ މިހާރު އަހަރެއްހާ ދުވަސް ވެއްޖެއެވެ.
