މިދިޔަ 52 ހަފްތާއަކީ ދިވެހިރާއްޖޭގެ ކުޅިވަރަށް އުފާވެރިކަން ގެނެސްދީ، ރަން އަކުރުން ފަވާލެވުނު އަހަރެއްކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް އެއްއަހަރު ފުރުމާ ގުޅިގެން ޕީއެސްއެމުން ގެނެސްދިން ހާއްސަ ޕްރޮގްރާމްގައި ވާހަކަދައްކަވަމުން ވަޒީރު ރާފިޢު ވަނީ ކުޅިވަރު ވުޒާރާއިން ހޯދާފައިވާ މުހިންމު ކާމިޔާބީތައް ފާހަގަކުރައްވާފަ އެވެ.

ވަޒީރު ވިދާޅުވީ ކުޅިވަރު ވުޒާރާއަށް ވަރަށް ގިނަ ކާމިޔާބީ ލިބުނު މަސައްކަތްތަކެއް ނިމިދިޔަ 52 ހަފްތާގައި ކުރެވުނު ކަމަށެވެ. މިގޮތުން ބައިނަލްއަޤްވާމީ 75 ހަރަކާތެއްގައި ޤައުމީ އެތުލީޓުން ވަނީ ބައިވެރިކުރެވިފައިވާއިރު، ދިވެހިރާއްޖޭގައި ބައިނަލްއަގްވާމީ 9 މުބާރާތެއް ބޭއްވުނު ކަަށެވެ. ހޯދުނު ކާމިޔާބީތަކަށް ބަލާއިރު، އެކި ކުޅިވަރުތަކުން ދިވެހިރާއްޖެއަށް 15 މެޑަލް ދިވެހި އެތުލީތުން ހޯދައިދީފައިވާކަމަށްވެސް އޭނާ ވިދާޅުވި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ލަފާފުޅާއިއެކު ކުޅިވަރު ކުރިއެރުވުމަށް ގިނަ މަސައްކަތްތަކެއް ކުރެވުނުކަމަށްވެސް ވަޒީރު ވިދާޅުވި އެވެ.

މިދިޔަ އެއް އަހަރަކީ ދިވެހިރާއްޖޭގެ ކުޅިވަރަށް އުފާވެރިކަން ގެނެސްދީ، ރަން އަކުރުން ފަވާލެވުނު އަހަރެއްކަމަށްވެސް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވި އެވެ.