“ޗާލު ވެށި – މަގޭ ޒިންމާ” ގެ ނަމުގައި މަގުތަކުގައި ހުރި ޑިސްޓްރިބިއުޝަން ފޮށިތައް ސާފުކުރުމުގެ މަސައްކަތް ކުރިއަށްގެންދާ ގޮތަށް ހާއްސަ ހަރަކާތެއް ސްޓެލްކޯ އިން ފަށައިފިއެވެ.
ސްޓެލްކޯއިން ފަށާފައިވާ މި ހާއްސަ ޙަރަކާތަކީ އެކުންފުނީގެ ސަބް-ސްޓޭޝަންތަކާއި މަގުމަތީގައި ހުރި ޑިސްޓްރިބިއުޝަން ފޮށިތަކުގައި ތަތްކޮށްފައިވާ އިޝްތިހާރު ފަދަ ތަކެތި ނައްޓައި، ސާފުކުރުމަށް ފަށާފައިވާ ޙަރަކާތެއްކަމަށް އެކުންފުނިން ބުނެއެވެ.
އެ ޙަރަކާތް މިއަދު ހެނދުނު ފައްޓަވާދެއްވާފައިވަނީ، މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމާއި، މާލެ ސިޓީގެ މޭޔަރ އާދަމް ޢާޒިމް އަދި ސްޓެލްކޯގެ މެނޭޖިންގ ޑިރެކްޓަރ ޙުސައިން ފަހުމީ އެވެ.
ސްޓެލްކޯ އިން ބުނީ ސިލްސިލާކޮށް ކުރިއަށްގެންދާ މި ހަރަކާތުގެ ދަށުން މާލެ, ހުޅުމާލެ އަދި ވިލިމާލޭގެ އިތުރުން އެ ކުންފުނިން ހިދުމަތް ދެމުންދާ ރަށްތަކުގެ ސަބްސްޓޭޝަން ތަކާއި ޑިސްޓްރިބިއުޝަން ސްޓޭޝަން ހިމެނޭ ސަރަހައްދުތައް ސްޓެލްކޯ މުވައްޒަފުން ނުކުމެ ސާފުކޮށް ބެލެހެއްޓުމަށް ހަމަޖެހިފައިވާ ކަމަށެވެ.
މި ހަރަކާތް ފެށުމަށް ސްޓެލްކޯގެ ހެޑްއޮފީސް ކުރިމަތީގައި ބޭއްވި ހާއްސަ ރަސްމިއްޔާތުގައި ވާހަކަދައްކަވަމުން އެ ކުންފުނީގެ އެމްޑީ ފަހުމީ ވިދާޅުވީ، މި ހަރަކާތަކީ ކުޑަ މަޝްރޫޢެއް ނަމަވެސް އެކަމުގެ ސަބަބުން ނިކުންނަ ނަތީޖާ ވަރަށް ބޮޑުވާނެ ކަމަށާއި، މާލެ އަކީ ސާފުތާހިރު ތަނަކަށް ވުމަށް އެދޭ ކަމަށެވެ.
އަދި، ދުނިޔޭގެ އެހެން ގައުމުތަކުގެ ކެޕިޓަލް ސިޓީ ތަކޭ އެއްފަދައިން މާލެ އަށް ޒިޔާރަތްކުރާ ފަރާތްތަކުން މާލޭގެ ރީތި ތަނެއް ކަމަށް ބުނެ ތަޢުރީފުކުރަން ސްޓެލްކޯ އިން އެދޭ ކަމަށް ކަމަށާއި، އެކަން ހާސިލްކުރުމަށްޓަކައި މަސައްކަތުގެ މާހައުލާއި ގޯތިގެދޮރުގެ އިތުރުން ހިދުމަތްދޭ ފޮށިތައް ރީތިކޮށް ހުރުމަށް އެދޭ ކަމަށް ވެސް ފަހުމީ ވަނީ ވިދާޅުވެފައެވެ.
މީގެއިތުރުން، އެ މަސައްކަތަކީ މިއަދު ފަށާފައި ހުއްޓާލާނެ ކަމެއް ނޫން ކަމަށާއި، އެކަންތައް ކުރިއަށްގެންދާނެ ކަމަށް ވެސް ފަހުމީގެ ވާހަކަފުޅުގައި ފާހަގަކުރައްވަވާ ވަނީ، އެ ކުންފުނީގެ މުވައްޒަފުންގެ ފަރާތުން އެފަދަ ކަންކަމުގައި ލިބެމުންއަންނަ އެހީތެރިކަން ވެސް ފާހަގަކޮށްފައެވެ.
އަދި، އެމްޑީ ފަހުމީގެ ވާހަކަފުޅު ނިންމާލައްވަމުުން ވަނީ، ސްޓެލްކޯ އިން ކުރާ މަސައްކަތްތަކުގައި އަބަދުވެސް ދެއްވަމުންއަންނަ އެހީތެރިކަމަށް ވަޒީރު ތާރިޤަށް ހާއްސަ ޝުކުރެއް އަދާކުރައްވާފައެވެ.
