މިނިސްޓަރ އިހުސާން މިހެން ވިދާޅުވެފައި ވަނީ އެންޓިކޮރަޕްޝަން ލޯ އެންފޯސްމަންޓު އޭޖެންސީޒް އިން ދަ އޯއައިސީ މެންބަރު ސްޓޭޓްސްގެ މިނިސްޓަރުންގެ ދެވަނަ ބައްދަލުވުމުގައި ވާހަކަ ދައްކަވަމުންނެވެ. މި ބައްދަލުވުމުގައި މިނިސްޓަރ ވަނީ ކޮރަޕްޝަނާ ދެކޮޅަށް ކުރާ މަސައްކަތުގައި އައު އީޖާދުތަކާއި ޓެކްނޮލޮޖީ އަކީ މުހިންމު ވަސީލަތެއްކަމަށް ވިދާޅުވެފައެވެ.

ކޮރަޕްޝަންގެ ސަބަބުން މުޖްތަމައުގެ އިޖްތިމާއީ ފޭރާން ވީދި، ތަރައްގީއަށް ހުރަސްއެޅޭ ކަމަށް ވެސް މިނިސްޓަރ އިހުސާން ފާހަގަކުރެއްވިއެވެ. މިނިސްޓަރ ވިދާޅުވީ ކޮރަޕްޝަނާ ދެކޮޅަށް ކުރާ ހުރިހާ މަސައްކަތެއްގައި ވެސް ރާއްޖެ ދެމި އޮންނާނެކަމަށާއި ދެމެހެއްޓެނިވި ތަރައްގީ ހޯދުމަށާއި ރައްޔިތުންގެ ދުޅަހެޔޮކަން ހިމާޔަތްކުރުމަށްޓަކައި ކޮރަޕްޝަނާ ދެކޮޅަށް މަސައްކަތް ކުރައްވާނެކަމަށެވެ.

“މި މަސައްކަތަކީ ވަރަށް މުހިންމު މަސައްކަތެއްކަން އަޅުގަނޑުމެން އެންމެން ގަބޫލުކުރަން. އެހެންނަމަވެސް އަޅުގަނޑުމެންގެ ގައުމުތަކުގެ މެދުގައި ހަރުދަނާ އެއްބާރުލުމެއް ލިބިގެން ނޫނީ މި މަސައްކަތެއް ކާމިޔާބެއް ނުކުރެވޭނެ.” މިނިސްޓަރ އިހްސާން ވިދާޅުވިއެވެ.

މ،ިނިސްޓަރ އިތުރަށް ވިދާޅުވީ އޯއައިސީއަކީ ކޮރަޕްޝަން ހުއްޓުވުމަށް ބެސްޓް ޕްރެކްޓިސްތައް ހިއްސާކުރުމަށް އޮތް އެންމެ ރަނގަޅު ޕްލެޓްފޯމްކަމަށެވެ. ކޮރަޕްޝަން ހުއްޓުވުމަށް ގައުމުތައް އެކުގައި މަސައްކަތްކުރާނަމަ، އެކަމުގެ ސަބަބުން ސަރަހައްދީ ގުޅުންތައް އުފެދި، މުއައްސަސާތައް ހަރުދަނާކޮށް، ކޮރަޕްޝަން ހުއްޓުވުމަށް ހުރި ގޮންޖެހުންތަކަށް ހައްލު ލިބިގެންދާނެކަމަށް ވެސް މިނިސްޓަރ ވިދާޅުވިއެވެ.

މީގެއިތުރުން މިނިސްޓަރ ވަނީ ސައުދީއަރަބިއްޔާއާއި ރާއްޖޭގެ އެންޓި ކޮރަޕްޝަން ކޮމިޝަން ގުޅިގެން އަންނަ އަހަރުގެ މެއި މަހުގެ 6-7 އަށް ރާއްޖޭގައި ބޭއްވުމަށް ހަމަޖެހިފައިވާ “ފަތުރުވެރިކަމުގެ ދާއިރާގައި އިންޓެގްރިޓީ އިތުރުކުރުން” ގެ ނަމުގައި ބާއްވާ، ޖޮއިންޓް އިންޓަރނޭޝަނަލް ފޯރަމް އަށް މެމްބަރު ހުރިހާ ގައުމުތަކަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ނަންފުޅުގައި ދައުވަތު އަރުވާފައެވެ.