ވޭސްޓް މެނޭޖްމެންޓް ކޯޕަރޭޝަން (ވެމްކޯ) އިން ފޯރުކޮށްދެމުންދާ ރިސޯޓް ކުނި ކަލެކްޝަން ހިދުމަތާއި އިތުރު ރިސޯޓެއް ގުޅިއްޖެކަމަށް އެ ކުންފުނިން ބުނެފިއެވެ.
ވެމްކޯއިން އެކްސްގައި ކުރެއްވި ޕޯސްޓެއްގައި، ވަނީ ރިސޯޓް ކުނި ކަލެކްޝަން ހިދުމަތް ދިނުމަށް އެ ކުންފުންޏާއެކު ސިއްރުފެން ފުށި ރިސޯޓުން އެއްބަސްވުމެއްގައި ސޮއިކޮށްފައިވާކަމަށް ބުނެފައެވެ. މި އެއްބަސްވުމުގައި ވެމްކޯގެ ފަރާތުން ސޮއިކޮށްފައި ވަނީ ވެމްކޯގެ މެނޭޖިންގ ޑިރެކްޓަރ މުޖުތަބާ ޖަލީލްއެވެ.
މި ރިސޯޓާއެކު ވެމްކޯގެ ރިސޯޓް ކުނި ކަލެކްޝަން ހިދުމަތް ލިބިގަންނަ ރިސޯޓްތަކުގެ އަދުދު ވަނީ 09 އަރާފައެވެ.
ވެމްކޯ އިން ރިސޯޓް ކުނި ކަލެކްޝަން ހިދުމަތް ދޭން ފަށާފައި ވަނީ މިދިޔަ ޖުލައި މަހުއެވެ. މި ހިދުމަތުގެ ސަބަބުން ރިސޯޓްތަކުގެ ކުނި މެނޭޖްކުރުމުގެ މަސައްކަތް ފަސޭހަވެ، ތިމާވެށި ރައްކާތެރިކުރުމަށް އިތުރު ބާރެއް ލިބިގެންދާނެކަމަށް ވެސް ވެމްކޯއިން ހާމަކޮށްފައިވެއެވެ.
