މީޑިއާތަކަށް މަޢުލޫމާތުދެމުން މިފްކޯއިން ބުނީ އެކުންފުނީގެ ކޫއްޑޫ ފިޝަރީޒް އަދި އައްޑޫ ފިޝަރީޒް ކޮމްޕްލެކްސް އަށް މިދިޔަ މަހުގެ 28 އިން ފެށިގެން ނޮވެންބަރ މަހުގެ 15 އާއި ހަމައަށް ކިރާފައިވާ މަހަށްވާ 22،922،141ރ މިއަދު އޮޑިވެރިންނަށް ޖަމާކޮށްދީފައިވާކަމަށެވެ.

މިފްކޯއިން އިތުރަށް ބުނީ އެކުންފުނީގެ ފެލިވަރު ފިޝަރީޒްއަށް ކިރާފައިވާ މަހަށްވާ ފައިސާ ޖަމާކުރުމުގެ މަސައްކަތް އެކުންފުނިން ވަރަށް ބާރަށް ކުރަމުންދާކަމަށެވެ.

އޮކްޓޫބަރ 28 އިން ފެށިގެން ނޮވެންބަރ 15 އާއި ހަމައަށް 1919 މެޓްރިކް ޓަނުގެ މަސް މިފްކޯއިން ވަނީ ކިރާފައެވެ.

މިފްކޯއިން ބުނި ގޮތުގައި މި ނޮވެންބަރު މަހުގެ 16 ވަނަ ދުވަހުން ފެށިގެން 24 ވަނަ ދުވަހާއި ހަމައަށް މަސްވެރިންނަށް ނުދެވި ހުރި ފައިސާގެ އަދަދަކީ 30 މިލިއަން ރުފިޔާއެވެ. މިފްކޯއިން ދަނީ ރައީސް މުޢިއްޒުގެ ވަޢުދުފުޅާއެއްގޮތަށް 48 ގަޑިއިރުގެ ތެރޭގައި މަސްވެރިންނަށް ފައިސާދިނުމަށް ގިނަ މަސައްކަތްތަކެއް ކުރަމުންނެވެ. މިގޮތުން މިފްކޯގެ ސްޓޯރޭޖް ކެޕޭސިޓީ އިތުރުކުރުމަށް އެކުންފުނިން ދަނީ ގިނަ މަސައްކަތްތަކެއް ކުރަމުންނެވެ