މަޖިލީހުގެ އިއްޔެގެ ޖަލްސާގައި މަރަދޫ ދާއިރާގެ މެންބަރު އަހުމަދު ދީދީ ވަނީ އައްޑޫ ލިންކު ރޯޑުގެ ހާލަތު އޮތީ ރައްޔިތުންގެ މުދަލާއި ފުރާނައަށް ވެސް ގެއްލުން ވާ ހާލާތުގައިކަން ފާހަގަކުރައްވައި، އެ މަސައްކަތް އޮތް ހިސާބު އަދި ފެށޭނެ ތާރީޚަކާ ގުޅޭގޮތުން ސުވާލުކުރައްވާފައެވެ.

މެންބަރުގެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އައްޑޫ ލިންކް ރޯޑު މަޝްރޫއަކީ މުޅި ރާއްޖޭގައި ވެސް މަޝްރޫއުތަކުގެ ތެރެއިން އެންމެ ސަމާލުކަން ދޭން ޖެހޭ މަޝްރޫއު ކަމަށެވެ. އަދި އެއީ ރައްޔިތުންގެ ސަލާމަތާއި ރައްކާތެރިކަމާ ގުޅިފައިވާ މަޝްރޫއެއްކަން ފާހަގަކުރައްވައި މިނިސްޓަރު ވިދާޅުވީ އެ މަޝްރޫއު ކުރިއަށް ގެންދިޔުމަށް ސާވޭތަކެއް ކޮށް، އަގުތަކެއް ވެސް ހޯދައިވާ ކަމަށެވެ.

އެގޮތުން، މި އަހަރުގެ ތެރޭގައި ބަޔަކާއެކު ސޮއިކޮށް، މަޝްރޫއުގެ އަމަލީ މަސައްކަތް ފެށުމަށް މަސައްކަތް ކުރަމުންދާ ކަމުގައި މުއްތަލިވް ވިދާޅުވިއެވެ.

“އަޅުގަނޑުމެން މަސައްކަތްތަކެއްކޮށް، ސާވޭތަކެއް ކޮށް، އަގުތައް ވެސް ހޯދާފައި މިވަނީ. އެކި އޮޕްޝަންތަކަށް ވެސް. މެންބަރަށް ވެސް އެނގިވަޑައިގަންނަވާނެ މި އަހަރު ބަޖެޓުގައި ސީދާ ވަކިން ޕްރޮޖެކްޓުގެ ގޮތުގައި ހިމެނިފައި އޮތް އެއްޗެއް ނޫން އެއީ. އެހެންނަމަވެސް އަޅުގަނޑުމެން މަސައްކަތް މި ކުރަނީ މި އަހަރު ތެރޭގައި އިރާދަކުރެއްވިއްޔާ ސޮއި ކޮށްގެން އަމަލީ މަސައްކަތް ފަށަން”، މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ އެ މަސައްކަތުގެ ތެރޭގައި ހިތަދޫގެ ސަރަހައްދެއް ހިއްކުމާއި ލިންކު ރޯޑު އެކްސްޓެންޑް ކުރުން ވެސް ހިމެނޭ ގޮތަށް މަގު އަލުން ހެދުމުގެ މަސައްކަތް އެންމެ އިސްކަމެއް ދޭ މަޝްރޫއުގެ ގޮތުގައި ފެށުމަށް ތައްޔާރުވަމުންދާ ކަމަށެވެ.

ލިންކު ރޯޑު ހެދުމުގެ މަސައްކަތް މި އަހަރުގެ ބަޖެޓުގައި ހިމަނާފައި ނުވި ނަމަވެސް ބަޔަކާ ހަވާލުކޮށްގެން އެ މަގުގެ މަސައްކަތް ފެށޭތޯ މަސައްކަތް ކުރަމުންދާ ކަމުގައި މިނިސްޓަރު ވަނީ މީގެކުރިންވެސް ވިދާޅުވެފައެވެ.

އައްޑޫ މަގުހެދުމުގެ މަޝްރޫއުގެ މަސައްކަތް ފެށީ 26 މެއި 2021 ގައެވެ. ނަމަވެސް މި ސަރުކާރުން ވެރިކަމާ ހަވާލުވިއިރުވެސް އެ މަސައްކަތް ނިމިފައެއް ނުވެއެވެ.