މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް އެކުލަވާލައި އާންމުންގެ ހިޔާލު ހޯދަން ހުޅުވާލާފައިވާ ބޭރު ފައިސާއާ ބެހޭ ބިލަކީ ޑޮލަރުގެ ދަތިކަމަށް އޮތް ހައްލު ކަމަށާއި ބިލުގެ ސަބަބުން ޑޮލަރު ލިބުން ފަސޭހަވެގެން ދާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު އެކްސްގައި ކުރެއްވި ޕޯސްޓެއްގައި ވިދާޅުވީ މި ބިލުގެ ނަތީޖާއަކަށް ވެގެންދާނީ އާންމު ރައްޔިތުންނަށާއި ވިޔަފާރިވެރިންނަށް ޑޮލަރުގެ ތިޔާގިކަން ލިބިގެން ދިޔުން ކަމަށެވެ.
އެމްއެމްއޭ އިން ޑްރާފްޓްކުރި ބިލުގެ މައިގަނޑު މަގުސަދަކީ، މިދިޔަމަހު އަމަލުކުރަން ފަށާފައިވާ ބޭރު ފައިސާއާބެހޭ ގަވާއިދުގައި ބަޔާންކޮށްފައިވާ ކަންކަން އިތުރަށް ހަރުދަނާކުރުމެވެ. އެ ބިލު މިހާރު އާންމުންގެ ޚިޔާލަށް ހުޅުވާލާފައިވާއިރު، ބިލަކީ ވިޔަފާރިތަކާއި ރައްޔިތުންގެ ލާބައާއި މަންފާއާ ގުޅިފައިވާ ބިލަކަށް ވާތީ ވިޔަފާރިތަކުންނާއި އާންމު ރައްޔިތުންގެ ޚިޔާލު ހޯދަން ބޭނުންވާކަމަށްވެސް އެ އޮތޯރިޓީން ވެސް ބުނެފައިވެއެވެ.
ރައީސުލްޖުމްހޫރިއްޔާ ކުރެއްވި ޕޯސްޓްގައި ވިދާޅުވެފައި ވަނީ 500 ޑޮލަރު މާރު ކުރަންޖެހޭ ގޮތަށް ބޭރު ފައިސާއާ ބެހޭ ބިލުގައި އޮތުމަކީ ވަރަށް ރަނގަޅު ކަމެއް ކަމަށެވެ. އަދި އެކަމަށްޓަކައި އެމްއެމްއޭއަށް ވެސް ރައީސް ވަނީ ޝުކުރު އަދާ ކުރައްވައިފަ އެވެ.
ކިޔުންތެރިންގެ ޚިޔާލު
