އިޒްރޭލް ޕާސްޕޯޓް މަނާކުރަންވީ އެ ގައުމުގެ އިސްވެރިންނަށް ޓާގެޓްކޮށްގެންކަމަށް މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓަރސް (މަޓާޓޯ)ގެ ރައީސް އަބްދުﷲ ޣިޔާސް ވިދާޅުވެއްޖެއެވެ.

އޭނާ މިހެން ވިދާޅުވީ ދިވެހިރާއްޖޭގެ އިމިގްރޭޝަން ގާނޫނަށް އިސްލާހްގެނައުމުގެ ބިލާއި ގުޅޭގޮތުން އެ އެސޯސިއޭޝަންގެ ބޭފުޅުންނާއި ބައްދަލުކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީ (241 ކޮމެޓީ)ން މިއަދު ބޭއްވި ބައްދަލުވުމުގައި ވާހަކަ ދައްކަވަމުންނެވެ.

ޣިޔާސް ވިދާޅުވީ މިފަދަ ބޮޑެތި މައްސަލަތަކާއި ކަންކަމުގައި މަޓާޓޯއިން އަބަދުވެސް ސްޓަޑީއެއް، އެސެސްމަންޓެއް ނުވަތަ ދިރާސާއެއް ހަދާކަމަށެވެ. އަދި އެ އެސޯސިއޭޝަނުން ވާހަކަ ދައްކާނީ ނަމްބަރާއި ފެކްޓުތަކަށް ބިނާކޮށްކަމަށް އޭނާ ވިދާޅުވިއެވެ.

އޭނާ ވިދާޅުވީ އިސްރާއީލް ޕާސްޕޯޓް މަނާކުރުމުގެ މައްސަލައާ ގުޅިގެން ދިރާސާއެއް ކުރުމަށް ވަގުތު ލިބިފައި ނުވާކަމަށާއި ނަމަވެސް އެ ޕާސްޕޯޓް މަނާކުރުމަކީ ޖުމުލަގޮތެއްގައި އެ އެސޯސިއޭޝަނުން ތާއީދު ކުރާ ކަމެއްކަމަށެވެ.

ނަމަވެސް ޑުއެލް ޕާސްޕޯޓް ގެންގުޅޭ މީހުންނަކީ ޗެލެންޖެއްކަމަށާއި ރަޝިޔާ މީހުނާއި ފަލަސްތީނުގެ މުސްލިމުންވެސް އިޒްރޭލް ޕާސްޕޯޓް ގެންގުޅޭކަން އޭނާ ފާހަގަކުރެއްވިއެވެ.

މީގެއިތުރުން މި މައްސަލައާ ގުޅިގެން ދިވެހިރާއްޖޭގެ ރޭޓިންގ ޑައުންގްގްރޭޑެއް އައިސްފައިވާކަން ފިނޭންސް މިނިސްޓްރީ ހާމަކޮށްފައިވާކަމަށްވެސް އޭނާ ވިދާޅުވިއެވެ.

އޭނާ އިތުރަށް ވިދާޅުވީ އިޒްރޭލުގެ ފަހަތުގައި އެމެރިކާ އާއި އިނގިރޭސި ވިލާތާއި އިންޑިއާ ފަދަ ގައުމުތައް އެބަ ތިބިކަމަށާއި އެހެންވެ މިފަދަ ބޮޑު ނިންމުމެއް ނިންމާއިރު ވަރަށް ގިނަ ގޮތް ގޮތުން ވިސްނަން ޖެހޭކަމަށެވެ.

އެންމެ ރަނގަޅު ގޮތަކީ އިޒްރޭލްގެ ސަރުކާރާއި އިޒްރޭލުގެ އިސްވެރިންނަށް ޓާގެޓްކޮށްގެން އެކަން ކުރިއަށް ގެންދިއުންކަމަށްވެސް ވިދާޅުވިއެވެ.

މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމެޓީގައި މި މައްސަލައާ ގުޅިގެން މަޓާޓޯއާއެކު މަޝްވަރާކޮށްފައިވާއިރު އިޒްރޭލް ޕާސްޕޯޓް މަނާކުރުމުގެ މައްސަލައާ ގުޅިގެން ކަމާ ބެހޭ ފަރާތްތަކުގެ އިރުޝާދާއި ލަފާގެ މަތީން ތާވަލާ އެއްގޮތަށް ހަލުވި ކަމާއެކު އެ މަސައްކަތް ކުރިއަށް ދާނެ ކަމުގެ ޔަގީންކަން ސަރުކާރު ހިންގާ ޕީއެންސީން ވަނީ ދީފައެވެ.

ޕާސްޕޯޓް މަނާކުރާ ބިލުގެ މަސައްކަތް ނިންމާނެ ތާރީހެއްގެ ގޮތުގައި އެންމެ ފުރަތަމަ ދީފައިވަނީ އަންނަ އަހަރުގެ ފެބްރުއަރީ މަހެވެ. އެހެންނަމަވެސް، އެ ބިލްގެ މަސައްކަތް ވީހާވެސް އަވަހަށް ނިންމުމުގެ މަސައްކަތް ކުރަމުންދާކަމަށް ކަމަށް 241 ކޮމެޓީން ވަނީ ބުނެފައެވެ.

އިޒްރާއީލް ޕާސްޕޯޓު މަނާކުރުމަށް ސަރުކާރުން ނިންމީ އިޒްރޭލުން ފަލަސްތީނުގެ ރައްޔިތުންނަށް ދެމުންދާ ލާއިންސާނީ ހަމަލާތަކާ ގުޅިގެންނެވެ.