ސަރުކާރުން ތަޢާރަފުކުރަން ނިންމާފައިވާ އައު ޓެކްސީލައިން ޚިދުމަތުގެ ސަބަބުން އާންމު ރައްޔިތުންނަށާއި ޓެކްސީ ޑްރައިވަރުންނަށް ގިނަގުނަ ފައިދާތަކެއް ލިބިގެންދާނެއެވެ.
މި ޚިދުމަތުގެ ސަބަބުން ޓެކްސީ ކުރަން ބޭނުން ފަރާތްތަކަށް އައު ވަޒީފާތަކުގެ ފުރުޞަތު ހުޅުވިގެންދާނެއެވެ. ޑްރައިވަރުންގެ އިތުރުން މެކޭނިކުންނާއި އަދި އޮޕަރޭޝަނަލް ފީލްޑްގެ ވަޒީފާތައް ވެސް ހުޅުވިގެންދާނެއެވެ. އަދި ފްލެކްސިބަލްކޮށް މަސައްކަތް ކުރުމަށް ޕާރޓް ޓައިމް “ޑްރައިވަރ ޕޫލް” އެއް އެކުލަވާލާލުމަށް ވެސް ވަނީ ނިންމާފައެވެ.
ޕާޓްޓައިމްކޮށް މި މަސައްކަތް ކުރެވޭ ގޮތަށް ހުޅުވާލުމުން ރައްޔިތުންނަށް ފްލެކްސިބަލް އާމްދަނީއެއް ހޯދުމުގެ ފުރުޞަތު ލިބިގެންދާނެއެވެ. ދުވާލު ވަޒީފާ އަދާކުރުމަށްފަހު ހަވީރު އަދި ރޭގަނޑު ޓެކްސީ ދުއްވައިގެން އިތުރު އާމްދަނީއެއް ހޯދުމުގެ ފުރުޞަތު ލިބިގެންދާނެއެވެ.
މި ޓެކްސީ ލައިން އަކީ އިތުބާރު ހިފޭ ރައްކާތެރި ޚިދުމަތެއްގެ ގޮތުގައި ވެގެންދާނެއެވެ. ބޭނުން ކޮންމެ ވަގުތަކު ބޭނުން ކޮންމެ ތަނަކަށް ދިއުމަށް ޓެކްސީ ލިބޭނެއެވެ. މީގެއިތުރުން މި ޚިދުމަތަކީ ރައްކާތެރި އަދި ސްޓޭންޑަޑައިޒްޑް ޚިދުމަތައް ތަމްރީން ކުރެވިފައިވާ މުވައްޒަފުންނާއި އޮންބޯޑް މޮނީޓަރިންގ ސިސްޓަމް އާއި އެކު ފޯރުކޮށްދެވޭނެ ޚިދުމަތެކެވެ.
މިހާރު ޓެކްސީ ޑްރައިވަރުންގެ ގޮތުގައި އުޅުއްވާ ބޭފުޅުންނަށްވެސް މި ޚިދުމަތާ ގުޅުމުގެ ފުރުޞަތު އޮންނާނެއެވެ. މި ޓެކްސީލައިން ޚިދުމަތުގެ ސަބަބުން ޑްރައިވަރުންނަށް ރައްކާތެރިކަން ލިބިގެންދާނެއެވެ.
މި ޓެކްސީލައިން ޚިދުމަތަކީ ރައްޔިތުންނަށް އަވަސް އަދި ލުއިފަސޭހަ ދަތުރުފަތުރުގެ ނިޒާމެއް ޤާއިމުކޮށްދިނުމަށް ގެންނަ ބަދަލެކެވެ. މި ޚިދުމަތް ފެށުމުން އަތޮޅުތަކުގައި ދިރިއުޅުއްވާ ފަރާތްތަކަށްވެސް ފައިދާ ކުރާނެއެވެ. އަތޮޅުތަކުގައި އުޅުއްވާ ބޭފުޅުން އެކިއެކި ބޭނުންތަކުގައި މާލެ ވަޑައިގަންނަވާއިރު އެދުވަސްތަކުގައި އާމްދަނީ ހޯދުމުގެ ގޮތުން ޕާޓްޓައިމްކޮށް ޓެކްސީ ކުރުމުގެ ފުރުސަތު އޮންނާނެއެވެ.
މި ޓެކްސީލައިންގައި ހިމެނޭ ޓެކްސީ ދުއްވުމަކީ ފަސޭހައިން އަދާކުރެވޭނެ ވަޒީފާއެކެވެ. ޓެކްސީ ދުއްވަން ގަރާޖް ސިޓީއެއް ބޭނުމެއް ނުވާނެއެވެ. އަމިއްލަ ޙަރަދުގައި ކާރެއް ގަންނަން ވެސް ނުޖެހޭނެއެވެ. ހަމައެކަނި ލައިސެންސް ލިބުމާއެކު ޓެކްސީ ދުއްވޭނެއެވެ. ޑްރައިވަރުންގެ ރައްކާތެރިކަމަށްޓަކައި ހުރިހާ ވެހިކަލްތަކެއްވެސް ހުންނާނީ އިންޝުއަރ ކުރެވިފައެވެ. މީގެއިތުރުން މަރާމާތު ކުރުމުގެ ޚަރަދުތައް ޑްރައިވަރުން އަމިއްލައަށް ދައްކާކަށް ނުޖެހޭނެއެވެ.
