ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ސަރުކާރު ހިއްސާ އޮންނަ ކުންފުނިތަކަށް އަންގައިފިއެވެ. އަންނަ މަހު ފެށޭ ރަމަޟާން މަހާ ދިމާކޮށް ގާނޫނުން ލާޒިމުކުރާ ރޯދަ އިނާޔަތް ފިޔަވައި އިތުރު އެއްވެސް ހަދިޔާއެއް މުވައްޒަފުންނަށް ނުދިނުމަށެވެ.

މިއަދު ޕީސީބީން ނެރުނު ސާކިއުލާގައި ވަނީ ކުންފުނިތަކަށް އަންގާފައި، ގާނޫނުގައި ބަޔާންކޮށްފައިވާ ގޮތަށް 3,000 ރުފިޔާގެ ރޯދަ އެލަވަންސް ދިނުމަށެވެ. މީގެ ދެ ދުވަސް ކުރިން މިނިސްޓްރީ އޮފް ފިނޭންސުން ވަނީ ސަރުކާރު މުވައްޒަފުންނަށް މި މަހުގެ 20 ގެ ކުރިން ރޯދަ އިނާޔަތް ދިނުމަށް އަންގާފައެވެ.

ޕީސީބީގެ ސާކިއުލާގައި އިތުރަށް ބަޔާންކޮށްފައިވާ ގޮތުގައި، އެއް ވަޒީފާއަށް ވުރެ ގިނަ ވަޒީފާ އަދާކުރާ މީހުންނަށް ހަމައެކަނި އަސާސީ ވަޒީފާ އަދާކުރާ ތަނުން އެލަވަންސް ދޭންވާނެއެވެ. އަދި ޕޭ ލީވްގައި އަދި ނޯޕޭ ލީވްގައި ތިބޭ މުވައްޒަފުންނަށް މި އިނާޔަތް ހަމަޖައްސަން ނުޖެހޭނެ ކަމަށްވެސް ބަޔާންކޮށްފައިވެއެވެ.

ފާއިތުވި އަހަރުތަކުގައި، ސަރުކާރުގެ ހިއްސާ އޮންނަ ބައެއް ކުންފުނިތަކުން ވަނީ ރަމަޟާން މަހާ ދިމާކޮށް މުވައްޒަފުންނަށް އެކި ބާވަތުގެ ހަދިޔާ ދީފައެވެ. މީގެ ތެރޭގައި ކައްކަން ބޭނުންކުރާ ސާމާނާއި ރޯދައާ ގުޅޭ އެހެނިހެން ތަކެތި ހިމެނެއެވެ. ނަމަވެސް މިއަހަރު ޕީސީބީން ވަނީ މިފަދަ އިތުރު ހަދިޔާތައް ދިނުން މަނާކޮށްފައެވެ.

މީގެ އިތުރުން, ޕީސީބީން ވަނީ ޚަރަދު ކުޑަކުރުމަށް ފިޔަވަޅުތަކެއް އެޅުމަށް އަންގައި ކުންފުނިތަކަށް އިތުރު ސާކިއުލާއެއް މިއަދު ފޮނުވާފައެވެ.

ރޯދަ އިނާޔަތް ދޭން ފެށީ 2015 ވަނަ އަހަރު ވަޒީފާއާ ބެހޭ ގާނޫނަށް ގެނެވުނު އިސްލާހާ ގުޅިގެންނެވެ. މި އިނާޔަތަކީ ގާނޫނީ ގޮތުން ދިނުން ލާޒިމު އެއްޗެކެވެ.