މިރޭ މާލޭގެ މަގުތަކަށް އެމްޑީޕީން ނިކުމެ މުޒާހަރާ ކުރަމުން ދަނީ ރައީސް މުއިއްޒުގެ ސަރުކާރާއި ހެދި ރައްޔިތުން ފުނޑިއްޖެ ކަމަށާއި އެހެންކަމުން ފުދިއްޖެކަމަށް ބުނެއެވެ. ހޮޅުއަށިތަކުގައި އާއްމުކޮށް ބުނާގޮތަށް، ބަހެއް އިންސާނާގެ އަނގައިން ބޭރުވާ ހިސާބުން އެބަހެއް އޭނާ އަކީ އެ ބުނެވުނު ބަހުގެ އަޅެކެވެ. މި އުސޫލުން މި ބަލައިލަނީ އެމްޑީޕީން މިކިޔާ [ފުދިއްޖެ ފުނޑިއްޖެ] އަށެވެ.

ފަހަރުގައި މި މާނަކުރުން އެމްޑީޕީ ފިކުރުގެ ބޭފުޅުންނަށް ޤަބޫލުކުރަން ދަތިވެދާނެއެވެ. އެހެން ނަމަވެސް މިއީ ހަގީގަކެވެ.

އެންމެ ފުރަތަމަ ފަށާނީ އެމްޑީޕީން މިކިޔާ [ފުނޑިއްޖެ] އާއި ހިސާބުންނެވެ. ފުނޑުނީ ކޮންބައެއްތޯ ބަލަމާ ހިނގާށެވެ. ދައްކަން މިއުޅެނީ އެމްޑީޕީ ވެރިކަމުގެ ވާހަކައެވެ. އެމްޑީޕީގެ ސަރުކާރުގެ ފިނޭންސް މިނިސްޓަރު އަމީރު ފަޚުރުވެރިކަމާއި އެކު ވިދާޅުވެފައިވާ ގޮތުގައި، އެމްޑީޕީގެ ވެރިކަމުގައި 8 ބިލިއަން ޗާޕުކޮށް، 60 ބިލިއަން ރުފިޔާގެ ދަރަނި އުފެއްދިއެވެ. އެއީ އަމީރު ވިދާޅުވި ގޮތުން ފަޚުރެއް ކަމުގައި ވިޔަސް އެއީ ރާއްޖޭގެ އިޤްތިސާދު ފުނޑާލުމެވެ. މަޝްރޫއުތައް އެމްޑީޕީގެ ވެރިކަމުގައި ހިންގީ އަސްލު އަގަށްވުރެ އެތައް ތަނެއް ބޮޑުކޮށެވެ. އަދި ބަދަލު ދިނުމުގެ ނަމުގައި ދައުލަތުގެ ހަޒާނާ ލޫޓުވައިލީ ވެސް އެމްޑީޕީގެ ވެރިކަމުގައެވެ. މިއީ އެމްޑީޕީން ފުނޑާލި ފުނޑާލުމުގެ ކުޑަ މިންވަރެކެވެ. ކޮވިޑްގެ ބަލާއާފާތުގެ ތެރޭގައި ވެންޓިލޭޓަރުން ވައްކަން ކުރީ އެމްޑީޕީ އިންނެވެ.

މިއީ މިވަގުތަކަށް ހަނދާނަށް އައި މިންވަރެވެ. މިހުރިހާ ޖަރީމާއަކަށް ފަހު ދެން [ފުދިއްޖެ] އަކީ ކޮބައިތޯ ބަލާލަން ހިނގާށެވެ. ނުވަތަ ފުދުނީ ކޮންބަޔަކަށްތޯ ބަލަން ހިނގާށެވެ.

އެމްޑީޕީގެ ވެރިކަމުގައި ފުދުނީ އެމްޑީޕީގެ މިނިސްޓަރުންނާއި އެމްޑީޕީގެ ވެރިކަމުގެ އެތެރެ ކޮއިލުގައި ތިބި ފަރާތްތަކާއި ގާތް ގުޅުމެއް އޮން މީހުންނަށެވެ. އެގޮތުން އިކޮނޮމިކް މިނިސްޓަރު ފައްޔާޒު އިސްމާއިލްގެ މަސްލަހަތު އޮންނަ ކުންފުންޏަކުން ދައުލަތުގެ މީޑިއާ ޕީއެސްއެމް މެދުވެރިކޮށް ނެގި 30 މިލިއަން ރުފިޔާ 2019 ވަނަ އަހަރުގެ މަޖިލިސް އިންތިހާބުގައި އެމްޑީޕީ މެމްބަރުންގެ ކެމްޕެއިނަށް ޚަރަދުކުރިއެވެ. އަދި ނުވިތާކަށް ސަދާން ސީސް ޕްރައިވެޓް ލިމިޓެޑް ނަމަކަށް ކިޔާ ކުންފުނިން ދަތުރުކުރުމުގެ ޚިދުމަތް ދިނުމަށް އާރުޑީސީއާއެކު ހެދި އެއްބަސްވުމެއްގެ ދަށުން އެ ކުންފުންޏަށް އާރުޑީސީން ޖަމާކުރި ފައިސާ އެ ކުންފުނިން ފައްޔާޒުގެ އެކައުންޓަށް ޖަމާކުރުމުން އެ ފައިސާ ބޭނުންކުރައްވައިގެން ފައްޔާޒުގެ ކްރެޑިޓް ކާޑަކަށް ފައިސާ ދައްކަވާފައިވާ މައްސަލައަކީ ވެސް ފުދުމުގެ މިސާލެކެވެ.

ކުރުކޮށް ބުނެލާނަމަ، އެމްޑީޕީ ވެރިކަމުގައި ފުނޑުނީ ރައްޔިތުންނެވެ. ފުދިގެން ނުވަތަ ފުދިއްޖެއޭ ބުނެވެން އޮތީ އެ ސަރުކާރުގެ މަތީ ފަޑީގައި ތިބި ފަރާތްތަކަށެވެ. އެބޭފުޅުން މިހާރު އެ ވިދާޅުވާ ފުދިއްޖެ އަދި ފުނޑިއްޖެ އަކީ އަސްލު އެއީއެވެ.