ފެނަކަ ކޯޕަރޭޝަން މެދުވެރިކޮށް ވައްކަމާއި ކޮރަޕްޝަނުގެ ޢަމަލުތައް ހިންގިކަމުގެ ތުހުމަތުކުރެވި އެފަދަ ވާހަކަތައް ފާއިތުވި ވެރިކަމުގައި އެ ކުންފުނީގެ އެމްޑީ ކަމުގައި ހުންނެވި އަހްމަދު ސައީދަށް ތުހުމަތުކުރެވޭ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ދަނީ ބަލަމުންނެވެ. އޭސީސީ އިން ބަލަމުން ގެންދާ މައްސަލައިގެ ސީރީއަސް ކަމުގެ އެޅި ފިޔަވަޅެއްގެ ގޮތުގައި ސައީދުގެ ޕާސްޕޯޓް ވެސް ވަނީ ހިފަހައްޓާފައެވެ.
ސައީދުގެ މައްޗަށް ތުހުމަތުކުރެވޭ މައްސަލަ އޭސީސީ އިން ބަލަމުން ގެންދާއިރު ފާހަގަކޮށްލެވޭ އެއްކަމަކީ، އޭނާގެ އެމްޑީ ކަމުގައި ފެނަކަ މެދުވެރިކޮށް ކޮރަޕްޝަނުގެ އަމަލުތައް ހިންގައިފައިވާ ކަމަށް ޚުދު އެމްޑީޕީގެ އިސް ފަރާތްތަކުން ވެސް ޤަބޫލުކޮށް އެތުހުމަތުކޮށްފައިވާ ކަމެވެ. އެގޮތުން ސައީދަށް އެ ތުހުމަތު ކުރެއްވި ފަރާތްތަކުގެ ތެރެއިން އެންމެ ފާޅުކަން ބޮޑު ގޮތެއްގައި އެވާހަކަ ދައްކާފައި ވަނީ އެމްޑީޕީގެ ޗެއާޕާސަންގެ ނައިބު އިބްރާހިމް ވަހީދު (އިބުރޭ) އެވެ.
އެމްޑީޕީގެ ޗެއާޕާސަން ފައްޔާޒު އާއި ގާތްގުޅުމެއް އޮންނަ އިބުރޭ އަކީ ފެނަކަ ކޯޕަރޭޝަނުގެ ގެ ޑެޕިއުޓީ މެނޭޖިން ޑިރެކްޓަރުގެ މަގާމު އަދާކުރެއްވި ބޭފުޅެކެވެ. އެމަގާމުން އޭނާ އިސްތިއުފާ ދިނީ ވެސް އެމްޑީ ސައީދަށް ތުހުމަތުތަކެއް ކުުރުމަށްފަހުއެވެ. އެގޮތުން މަގާމުން އިސްތިއުފާ ދެއްވައި އޭނާ ސައީދަށް 2022 ވަނަ އަހަރު ފޮނުވި ސިޓީގައި ބުނެފައިވާ ގޮތުގައި ފެނަކަ ހިންގަމުންދަނީ ޗެއާމަން މުހައްމަދު ރަޝީދާއި އެމްޑީ ސައީދުގެ ”އަމިއްލަ ކުންފުންޏެއް“ގެ ގޮތުގައި ކަމަށެވެ.
ސިޓީގައި އިބުރޭ ފާހަކޮށްފައި ވަނީ ފެނަކަ ތެރޭގައި ކޮރަޕްޝަންގެ އަމަލުތައް ތަކުރާރުކޮށް ހިންގަމުންދާ ކަމަށެވެ. އެގޮތުން ކުންފުނިން އެކި ފަރާތްތަކަށް ދައްކަން ޖެހޭ ބިލްތަކަށް ވެސް ގަވައިދުން ފައިސާ ދައްކަމުން ނުގެންދާ ކަމަށާއި ބިލްތަކަށް ފައިސާ ދެނީ ހަމައެކަނި ސައީދާ ގުޅުން އޮންނަ ވިޔަފާރިތަކަށް އެކަނި ކަމަށް އޭނާ ފާހަގަކޮށްފައިވެއެވެ.
”މަނިކުފާނު (ސައީދު) އާއި ޗެއާމަން ރަޝީދު އާއި ކުންފުނި ހިންގަން ހަވާލުވިއިރު ކުންފުނީގެ ދަރަނީގެ ގޮތުގައި އޮތް 680 މިލިއަން ރުފިޔާ ތިޔަ ދެ ބޭފުޅުން ހިންގަވަމުން ގެންދަވާ ކޮރަޕްޝަނަށް މަގުފަހިވާ އަމަލުތަކާ އަދި ދެ ބޭފުޅުންގެ ނާގާބިލުކަމުން މިއަދު ވަނީ 1.5 ބިލިއަން ރުފިޔާއަށް އިތުރުވެފައި،“ އިބުރޭ 2022 ވަނަ އަހަރު ފޮނުވި ސިޓީގައި ފާހަގަކޮށްފައިވެއެވެ.
ފެނަކަ ކޯޕަރޭޝަން އަކީ ރާއްޖޭގެ ގިނަ ރަށްތަކަކަށް ކަރަންޓު، ފެން އަދި ނަރުދަމާގެ ޚިދުމަތް ދެމުންދާ ކުންފުންޏެއް ކަމަށް ވާއިރު އެ ކުންފުނި މެދުވެރިކޮށް ކުރީ ސަރުކާރުގައި ހިންގި ކޮރަޕްޝަނުގެ އަމަލުތަކުގެ ސަބަބުން ކުންފުނި ހިންގުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
ސުވާލަކީ ފެނަކަ ކޯޕަރޭޝަނުން އެމްޑީޕީ ސަރުކާރުގައި އެމްޑީއަކަށް ހުރި އަހްމަދު ސައީދު ވައްކަން ކުރިކަމަށް، އެޕާޓީގެ ޗެއާޕާސަންގެ ނައިބު އިބުރޭ ބުނެފައިވާއިރު އެއީ އެމްޑީޕީން ވެސް އެޕާޓީގެ ސަރުކާރުގައި ވައްކަން ކުރިކަމަށް ވި އިއުތިރާފެއް ތޯއެވެ؟ މިކަމާއި މެދު ކޮންމެ ގޮތަކަށް އެމްޑީޕީން ވާހަކަ ދެއްކިޔަސް އޭސީސީއިން ކުރިއަށް ގެންދާ ތަހުގީގުގައި ޗެއާޕާސަންގެ ނައިބު އިބުރޭ އަކީ މުހިއްމު މީހަކަށް ވާނެ ކަން ކަށަވަރެވެ.
