އިމާމުން ތާޒާކޮށް ތަމްރީން ކުރުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ ޤައުމީ މަޝްރޫއުގެ ދަށުން މާލެ ސިޓީގައި މަސައްކަތް ކުރާ އިމާމުން ތާޒާކޮށް ތަމްރީން ކުރުމުގެ ޕްރޮގުރާމެއް ފަށައިފިއެވެ.
މި ޕްރޮގުރާމް ކުރިއަށް ގެންދަނީ އިސްލާމީ މަރުކަޒުގެ ޖަލްސާ ކުރާ މާލަމުގައެވެ. މި ޕްރޮގުރާމުގައި މާލެ ސިޓީގައި މަސައްކަތްކުރާ ގިނަ އިމާމުން ބައިވެރިވެފައިވެއެވެ.
މާލެ ސިޓީގެ އިމާމުންގެ ތަމްރީނު ނިމުމާއެކު 2024 ގައި އަމާޒު ހިފާފައިވާ ގޮތަށް މިއަހަރުގައި ރާއްޖޭގެ އެންމެހައި މިސްކިތްތަކުގެ އިމާމުން ތަމްރީނުކޮށް ނިމޭނެއެވެ.
އިމާމުން ތަމްރީނު ކުރުމުގެ ޤައުމީ މި މަޝްރޫޢުގެ ދަށުން މި އަހަރުގެ މިހާތަނަށްއައިއިރު 818 އިމާމުން ތަމްރީނު ކުރެވިފައިވާއިރު މި ތަމްރީނުގައި، ފިޤުހާއި، ހަދީސް، ތަފްސީރު، މުޖުތަމަޢު ބިނާކުރުމުގައި މިސްކިތްތަކުގެ ދައުރާއި، އިމާމުންނާ ބެހޭ ވަޒީފާގެ ޤަވާޢިދުތައް މި ފަދަ ދާއިރާތަކުން އާ މައުލޫމާތާއި ތަމްރީނު ދީފައިވެއެވެ.
