ނައިންޓީ ޕްލަސް ގޯލްޑް ކަޕް 2024 ގައި އިއްޔެ ކުޅުނު މެޗުތަކަށްފަހު މާލެ ސިޓީ، ރ. އަލިފުށި އަދި ޅ. ނައިފަރު އެ މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ.

މާލެ ސިޓީން ވަނީ 1-0 އިން ޅ. ކުރެންދޫ ބަލިކޮށްފައެވެ. ދ. މީދޫ އަތުން ނައިފަރު މޮޅުވީ 2-0 އިންނެވެ.

ގަލޮޅު ރަސްމީ ދަނޑުގައި ރޭ ކުޅުނު މެޗުގައި މާލެ ސިޓީގެ ހަމައެކަނި ލަނޑުޖަހައިދިނީ މުޙައްމަދު ޔަޒްދާން އެވެ.

މި ނަތީޖާއާއެކު މާލެ ސިޓީގެ އިތުރުން އެ ގްރޫޕުގައި ހިމެނޭ އަލިފުށި ވަނީ ކުއާޓާ ފައިނަލަށް ދަތުރުކޮށްފައެވެ.

އެ މެޗުން ބަލިވި ކުރެންދޫ ވަނީ މުބާރާތުން ކަޓާފައެވެ.

މީދޫއާ ނައިފަރު ބައްދަލުކުރި މެޗުގެ ތެރެއިން. –ފޮޓޯ: މިހާރު

ގޯލްޑް ކަޕްގައި އިއްޔެ ހަވީރު ކުޅުނު މެޗުގައި ނައިފަރުން ޖެހި ދެލަނޑުގެ ތެރެއިން އެއްގޯލަކީ މީދޫގެ ހައްމާމް ރަޝީދު އަތުން ބައިކޮޅަށް ވަތް ގޯލެކެވެ. އެ ޓީމުގެ އަނެއް ލަނޑުޖަހައިދިނީ މުޙައްމަދު ނަދީމެވެ.

ނައިފަރަށް ދެން އޮތީ އައްޑޫ ސިޓީއާ ދެކޮޅަށް ކުޅެން ޖެހޭ މެޗެވެ. އެ ގްރޫޕުން ކުއާޓާ އަށް ދާނެ ދެވަނަ ޓީމެއް ކަށަވަރުވެގެންދާނީ އެ މެޗަށްފަހު އެވެ. އެ މެޗު އެއްވަރުކޮށްލައިގެން ވެސް އައްޑޫ ސިޓީ އަނެއް ބުރަށް ދާނެ އެވެ.

މި މުބާރާތުގައި ދެން ކުޅޭ މެޗުގައި މާދަމާ ހަވީރު ބ. އޭދަފުށިން ނިކުންނާނީ ހއ. ދިއްދޫއާ ދެކޮޅަށެވެ. މާދަމާ ރޭ ކުޅުމަށް ހަމަޖެހިފައިވާ މެޗުގައި ފުވައްމުލަކު ސިޓީ ބައްދަލުކުރާނީ ކ. ގުރައިދޫ އާ އެވެ.