ކޮންމެ ރަމަޟާން މަހަކަށް ސަޢޫދީ ޢަރަބިއްޔާގެ ސަރުކާރުން ދެއްވާ 50 ޓަނުގެ ކަދުރު ޝިޕްމަންޓު ރާއްޖެ އަތުވެއްޖެއެވެ.
އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް އަލީ ސަޢީދު ރޭގައި ހިއްސާކުރެއްވި މެސެޖެއްގައި ވަނީ ސައުދީ ސަރުކާރުން ކޮންމެ އަހަރެއްގެ ރަމަޟާން މަހަށް ހަދިޔާކުރާ 50 ޓަނުގެ ކަދުރު ރާއްޖެ އަތުވެފައިވާކަމަށެވެ.
އަދި އެ ކަދުރު މިހާރު މިނިސްޓްރީއަށް ލިބިފައިވާ ކަމަށާއި ރޯދަމަހުގެ ކުރީން އެ ކަދުރު ބަހައި ނިންމާނެ ކަމަށް ވަޒީރު ވަނީ ވިދާޅުވެފައެވެ.
ވަޒީރު ވިދާޅުވީ މިފަހަރު ކަދުރު ބެހުމުގައި މިސްކިތްތަކުގައި ރޯދަ ވީއްލުމުގެ ޕްރޮގްރާމްތައް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭނެކަމަށެވެ.
ސައުދީ ސަރުކާރުން ކޮންމެ އަހަރެއްގެ ރަމަޟާންމަހަށް ވެސް ރާއްޖެއަށް ކަދުރު ހަދިޔާކުރެއެވެ. ނިމިދިޔަ އަހަރު ހަދިޔާކުރި ކަދުރު ބަހާފައި ވަނީ ރަމަޟާން މަސް ނިމުމާ ގާތްވެފައި ވަނިކޮށެވެ.
