މިދިޔަ ނޮވެމްބަރު މަހު ޒަކާތު ފަންޑުން ބޭސްފަރުވާ ކުރުމަށް 61 މީހަކަށް އެހީތެރިކަން ފޯރުކޮށްދީފައިވާއިރު އެންމެ އެހީ ގިނަ ދިނީ ކެންސަރާއި، ހިތުގެ އޮޕަރޭޝަނަށްކަމަށް ތަފާސް ހިސާބުތަކުން ދައްކައިފިއެވެ.
ތަފާސްހިސާބުތަކުން ދައްކާގޮތުން މައިގަނޑު ހަތަރު ކަމަކަށް ޒަކާތު ފަންޑުން އެހީ ދީފައިވެއެވެ. އެއީ ކެންސަރު ބައްޔަށް ފަރުވާ ކުރުމަށާއި، ހިތުގެ އޮޕަރޭޝަން ކުރުމަށާއި، ޓްރާންސްޕްލާންޓާއި ސިކުނޑީގެ އޮޕަރޭޝަންތައް ކުރުމަށެވެ. އެހެނިހެން ބޭނުންތަކަށްވެސް ޒަކާތު ފަންޑުން އެހީ ދީފައިވެއެވެ.
ޒަކާތު ފަންޑުން އެހީދިން މިންވަރު:
- – ކެންސަރަށް ފަރުވާކުރުމަށް 84,810ރ.
- – ހިތުގެ އޮޕަރޭޝަންކުރުމަށް 67,848ރ.
- – ސިކުނޑީގެ އޮޕަރޭޝަންތަކަށް 248,782.88ރ.
- – ޓްރާންސްޕްލާންޓަށް 25,443ރ.
- – އެހެނިހެން ބަލިތަކަށް 294,754ރ.
މިދިޔަ މަހު ޒަކާތު ފަންޑުން ޖުމްލަ 1,086,381.81 ރުފިޔާވަނީ ޚަރަދުކޮށްފައިވާއިރު އެމަހުގެތެރޭ އެހީގެގޮތުގައި ޖުމްލަ 721,637.88 ރުފިޔާ ހަމަޖެހިފައިވެއެވެ.
އެހެނިހެން ޚަރަދުތަތަކުގެތެރޭގައި ޒަކާތަށް ހޭލުންތެރިކުރުމަށް ޕްރޮގްރާމްތައް ހިންގުމަށް ކޮށްފައިވާ ޚަރަދާއި ޒަކާތުގެ މަސައްކަތްކުރުމަށް ޒަކާތު ފަންޑުން މުސާރަ ދޭގޮތަށް ނަގާފައިވާ މުވައްޒަފުންގެ އުޖޫރަދިނުމަށް ޢާމިލުންގެ ބައިން ކުރެވިފައިވާ ޚަރަދު ހިމެނެއެވެ.
އެގޮތުން ހޭލުންތެރިކަމުގެ ޕްރޮގްރާމް ހިންގުމަށް 13,770 ރުފިޔާ ޚަރަދުކޮށްފައިވާއިރު، އިދާރީ މުވައްޒަފުންގެ އުޖޫރައިގެގޮތުގައި 273,410.08 ރުފިޔާ ހޭދަކޮށްފައިވެއެވެ.
