ރާއްޖެއިން ތައިލޭންޑަށް ކަނޑައަޅާ ސަފީރު ކަމަށް އިލެކްޝަންސް ކޮމިޝަންގެ ކުރީގެ ރައީސް ފުއާދު ތައުފީގު އައްޔަން ކުރުމަށް ރައްޔިތުންގެ މަޖިލީހުން ރުހުން ދީފިއެވެ.
ތައިލޭންޑު ސަފީރު ކަމަށް ފުއާދު އައްޔަން ކުރުމަށް ކޮމިޓީން ވަނީ މިމަހުގެ 3 ވަނަ ދުވަހު ރުހުން ދީފައެވެ. ރާއްޖޭގެ ފޮރިން ސާވިސް ގާނޫނުގެ 15 ވަނަ މާއްދާގައި ބަޔާން ކުރާ ސަފީރުންގެ ގޮތުގައި އައްޔަން ކުރާ މީހުންގެ ފުރިހަމަވާން ޖެހޭ ޝަރުތުތައް ފުއާދުގެ ކިބައިގައި ހަމަވާކަމަށް ކޮމިޓީގެ 10 މެންބަރަކު ވަނީ އެއްބަސްވެފައެވެ.
އިލެކްޝަންސް ކޮމިޝަންގެ ގާނޫނު ބުނާ ގޮތުން އެ ކޮމިޝަންގެ މެންބަރުކަން ދެ ދައުރަށް ވުރެ ގިނަ ދައުރު އަދައެއް ނުކުރެވޭނެއެވެ. ދެ ވަނަ ދައުރަކަށް އެ މަގާމަށް ފުއާދު އައްޔަން ކުރެއްވީ 2019 ގެ ނޮވެމްބަރުގައެވެ. އޭނާގެ ދެވަނަ ދައުރު ހަމަވުމުން އިލެކްޝަންސް ކޮމިޝަނުން ވަކިވެވަޑައިގެންނެވީ މިދިޔަ މަހުއެވެ.
