މާދަމައިން ފެށިގެން މަސްވެރިންނަށް އިތުރު ހަތަރު ސަރަހައްދަކުން އެސްޓީއޯ ރޭޓުގައި ތެޔޮ ގަންނަން ލިބޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވެފައި ވަނީ ކ އަތޮޅުގެ ބައެއް ރަށްތަކަށް ކުރައްވާ ރަސްމީ ދަތުރުފުޅުގައި އެ އަތޮޅު ގާފަރަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގައެވެ. ރައީސް ވިދާޅުވީ މާދަމައިން ފެށިގެން މާލެ އަތޮޅު ހިންމަފުށިންނާއި އައްޑޫ ސިޓީ ހުޅުމީދޫގެ އިތުރުން ކޫއްޑޫއާއި ފެލިވަރުން މަސްވެރިންނަށް އެސްޓީއޯ ރޭޓުގައި ތެޔޮ ގަންނަން ލިބޭނެ ކަމަށެވެ.
“މި އަންނަ އަހަރު ތެރެޔަށް ބަހާލެވިގެން، ކޮންމެ މަހަކުވެސް ކޮންމެ އަތޮޅެއްގައި، އެސްޓީއޯގެ ސްޓޭޝަން ހެދި، އެތަނުން ހިދުމަތް ދޭން ފެށޭނެ،މި ގޮތަށް ގޮސް 2025 ނިމޭއިރު މުޅި ރާއްޖޭގައި ވައުދުވީ ގޮތަށް އެސްޓީއޯ ރޭޓުގައި ތެޔޮ ލިބޭނެ ” ރައީސް ވިދާޅުވިއެވެ.
ސަރުކާރުން މަސައްކަތްކުރަމުން އަންނަނީ ކޫއްޑޫއާއި ފެލިވަރުގައި ހުންނަ ސަރުކާރުގެ މަސް ކުންފުނި މިފްކޯގެ ބޯޓުތަކުން ވެސް ހަމަ އެ ރޭޓުގައި މަސްވެރިންނަށް ތެޔޮ ދޫކުރަން ކަމަށް ވެސް ރައީސް ފާހަގަކުރެއްވިއެވެ. އޭގެއިތުރުން މަސްވެރިންގެ ދަފުތަރު އެކުލަވައިލުމުގެ މަސައްކަތް ކުރިއަށްދާ ކަމަށާއި އެ ދަފުތަރާ ބެހޭ ގަވާއިދު މި ހަފުތާގެ ބުރާސްފަތި ދުވަހު ގެޒެޓުކުރެވޭނެ ކަމަށް ރައީސް ވިދާޅުވިއެވެ.
މަސްވެރިންނަށް ހުރިހާ އަތޮޅަކުން ވެސް އެސްޓީއޯ ރޭޓުގައި ތެޔޮ ގަންނަން ލިބޭ ގޮތް ހެދުމަކީ ރައީސްގެ ރިޔާސީ ވައުދުފުޅެކެވެ. މިހާރު މަސްވެރިންނަށް އެ ރޭޓުގައި ތެޔޮ ލިބެނީ ހުޅުމާލޭގައި ހުންނަ ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑުން އެކަނިންކަން ފާހަގަކޮށްލެވެއެވެ.
