އެމްޑީޕީގެ ފަރާތުން އަންނަ އަންގާރަ ދުވަހު މާލޭގައި ބާއްވާ “ގާނޫނުއަސާސީގެ ދިފާއުގައި ރައްޔިތުން”ގެ ޖަލްސާއަށް ތައްޔާރުވުމުގެ ގޮތުން ރޭ ބޭއްވި އެ ޕާޓީގެ ޖަގަހަ ޖަލްސާގައި މަކުނުދޫ ދާއިރާގެ ކުރީގެ މެންބަރު ރާއީ ދެއްކެވި ވާހަކަފުޅަކަށް ފާޑުކިޔުން އަމާޒުވެއްޖެއެވެ.
މީސް މީޑިޔާގައި ރާއީ އަށް ފާޑުކިޔުން އަމާޒުވެފައިވަނީ، އެ ޖަލްސާގައި ޤާނޫނު އަސާސީގެ ދިފާއުގައި ތެދުވުމަށް ފޯރީގައި ރާއީ ޖަލްސާގެ ބައިވެރިންގެ ކިބައިން އެދިވަޑައިގަތް އިރު އިނގިރޭސި ބަހުން ވިދާޅުވި އެއްޗަކުންނެވެ. އެގޮތުން ރާއީ ވަނީ “ޕުލީޒް އިސްޓޭންޑް އަޕު” މިގޮތަށް ތަކުރާރުކޮށް ވިދާޅުވެފައެވެ.
ކުރީގެ މެންބަރު ރާއީ ވިދާޅުވި ބަހަކީ އިނގިރޭސި ބަހުގެ ހަމަތަކަށް ބަލާއިރު ރަނގަޅު ބަހެއް ނަމަވެސް ސޯޝަލް މީޑިޔާގައި ފާޑުކިޔުން އަމާޒުވީ، އޭނާގެ ޕްރޮނަންސިއޭޝަން ބޭނުން ކުރެއްވި ގޮތަށެވެ. އެގޮތުން ރާއްޖޭގައި ހިންގާ މީސްމީޑިޔާގެ އެކި ޕޭޖްތަކުގައި ރާއީ އަށް ފާޑުކިޔަމުން ގެންދާކަން ފާހަގަކޮށްލެވެއެެވެ.
“ގާނޫނުއަސާސީގެ ދިފާއުގައި ރައްޔިތުން” ގެ ނަމުގައި އެމްޑީޕީން ޖަލްސާ ބާއްވަން ނިންމާފައި ވަނީ ޑިސެމްބަރު 10 ވާ އަންނަ އަންގާރަ ދުވަހުގެ ރޭ ކާނިވާ ސަރަހައްދުގަ އެވެ. އެއީ ރާއްޖޭގެ މަސްވެރިންގެ ދުވަހާއި ބައިނަލްއަގްވާމީ އިންސާނީ ހައްގުތަކުގެ ދުވަސް ވެސް މެ އެވެ.
