ރާއްޖޭގައި ކޮޕީރައިޓާއި ބެހޭ ގާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހުތަކުގެ ބިލު ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރުގެ ފަރާތުން މި ބިލު ހުށަހަޅުއްވާފައިވަނީ ނިލަންދޫ ދާއިރާގެ މެންބަރު ފާތިމަތު ސައުދާއެވެ.
ކޮޕީ ރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު ދިރާސާކޮށް އިގްތިޞާދީ ކޮމެޓީން ނިންމި ގޮތުގެ ރިޕޯޓު މިއަދު ރައްޔިތުންގެ މަޖިލީހަށް ހުށަހަޅުއްވައިދެއްވީ ކޮމެޓީގެ މުޤައްރިރު، ފުވައްމުލަކު މެދު ދާއިރާގެ މެންބަރު އަލީ ފަސާދުއެވެ.
ކޮޕީ ރައިޓާއި އެއާ ގުޅޭ އެހެނިހެން ހައްގުތަކުގެ ގާނޫނަށް އިސްލާހު ގެނައުމުގެ ބިލު ދިރާސާކޮށް އިގްތިޞާދީ ކޮމެޓީން ނިންމިގޮތަށް ފާސްކުރުމާމެދު ގޮތެއް ނިންމުމަށް މަޖިލީހުގައި ނެގި ވޯޓުގައި ބައިވެރިވެވަޑައިގެންނެވި 57 މެންބަރުންވެސް ވޯޓު ދެއްވީ ބިލު ފާސްކުރުމާ އެއްކޮޅަށެވެ.
މި ބިލު ދިރާސާކޮށް ނިންމި ގޮތުގެ ރިޕޯޓު ހުށަހަޅުއްވައިދެއްވަމުން މެންބަރު ފަސާދު ވިދާޅުވިގޮތުގައި ސަރުކާރުގެ ފަރާތުން ހުށަހެޅި މި ބިލުގެ ބޭނުމަކީ ކޮޕީ ރައިޓާއި އެއާއި ގުޅޭ އެހެނިހެން ހައްގުތަކުގެ ގާނޫނުގެ ދަށުން ކޮޕީރައިޓުގެ ހިމާޔަތް ލިބިދޭ އުފެއްދުންތަކާއި ކޮޕީރައިޓާއި ގުޅޭ އެ ނޫން ވެސް ހައްގުތަކާއި ބެހޭ ކަންކަން އިތުރަށް ތަފްސީލު ކުރުމެވެ.
އަދި ހާއްސަ އެހީއަށް ބޭނުންވާ ފަރާތްތަކަށް ލިބިދޭ އިސްތިސްނާއާއި، ވިޔަފާރީގެ ފައިދާ ނުލިބޭ ގޮތަށް ދިރާސާކުރުމުގެ ބޭނުންގައި ލިބިދޭ އިސްތިސްތާ ހިމެނޭ ގޮތަށް ކޮޕީ ރައިޓްސް އުފެއްދުންތައް ނަކަލުކުރެވޭނެ ނުވަތަ ބޭނުންކުރެވޭނެ އިތުރު ހާލަތްތައް ކަނޑައެޅުމަށާއި، ކޮޕީ ރައިޓްސް ހައްގުތައް ހިމާޔަތް ލިބިދޭ މުއްދަތު އިތުރުކުރުމަށާއި، ކޮޕީ ރައިޓްސްއާ ގުޅޭ ހައްގުތައް ކަށަވަރުކުރުމުގައި އެނޫން ވެސް ގާނޫނު ތަންފީޒުކުރުމުގައި ދިމާވާ ބައެއް ދަތިތައް ޙައްލުކުރުމަށްޓަކައި އިސްލާހު ހުށަހަޅާފައިވާކަންވެސް ފާހަގަކުރެއްވިއެވެ.
