އައްޑު އަތޮޅުގައި ހިއްކި ސަރަހައްދުގައި އިތުރުވެފައިވާ ފަސްގަނޑުގައި ހުރި ވެލި ނުނެގުމަށް އަންގާފައިވަނީ އައްޑޫ ސިޓީގެ ލިންކު ރޯޑު އަލުން ހެދުމަށް ގިނަ އަދަދެއްގެ ވެލި ބޭނުންވާނެތީ ކަމަށް އިމާރާތްކުރުމާއި ބިނާރާ ބެހޭ ވުޒާރާގެ ވަޒީރު ޑރ. އަބްދުﷲ މުއްޠަލިބް ވިދާޅުވެއްޖެ އެވެ.
ވަޒީރު މުއްޠަލިބު މިހެން ވިދާޅުވެފައިވަނީ، އައްޑޫ ސިޓީގެ މޭޔަރު އަލީ ނިޒާރު އެކްސްގައި ކުރެއްވި ޕޯސްޓަކާ ގުޅިގެންނެވެ.
މޭޔަރު ނިޒާރުގެ ޕޯސްޓުގައި ވިދާޅުވެފައިވަނީ، ހަންކެޑެ ބްރިޖް އެޅުމަށް ހެދިފައިވާ ވަގުތީ ފަސްގަނޑުގައި ހުރި ވެލި ރައްޔިތުންގެ ބޭނުންތަކަށް ބޭނުންކުރުމަށް ކައުންސިލުން މަސައްކަތް ކުރަމުންދަނިކޮށް، ކުރިން އެއްވެސް މަޝްވަރާއެއް ނުކޮށް އިމާރާތްކުރުމާއި ބިނާރާ ބެހޭ ވުޒާރާގެ އެންޖިނިއަރުން ލައްވާ ސޮއިކުރުވައި އެ ވެލި އެ ވުޒާރާގެ ބެލުމުގެ ދަށަށް ގެންދެވިފައިވާ ކަމަށެވެ.
ވަޒީރު މުއްޠަލިބް ވިދާޅުވީ، އެ ވުޒާރާގެ ހުއްދަނެތި އެ ވެލި ބޭނުން ނުކުރުމަށް އެދުނީ އައްޑޫ ސިޓީގެ ލިންކު ރޯޑު އަލުން ހެދުމުގައި ގިނަ އަދަދަކަށް ވެލި ބޭނުންވެދާނެ ކަމަށް ފެންނާތީ ކަމަށެވެ. އަދި އައްޑޫ އަކީ ފަސޭހައިން ވެލި ނެގެން އޮތް ތަނަކަށް ނުވާތީވެ ކަމަށްވެސް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، މިވަގުތު އައްޑޫ ސިޓީގެ ލިންކު ރޯޑު އަލުން ހެދުމަށްވުރެ އެ ސިޓީގެ ރައްޔިތުންނަށް އެ ވެލި ބޭނުންކުރަން ޖެހޭ އެހެން މުހިއްމު ކަމެއްވާނަމަ ކައުންސިލުން އެދުމުން އެ ވެލި ދޫކުރުމަށް އިމާރާތްކުރުމާއި ބިނާރާ ބެހޭ ވުޒާރާ އިން ދެކޮޅެއް ނުހަދާނެ ކަމަށެވެ.
